سليم
فتحِت باب شقتها بسرعة وهيّ ماسكة إيد بنتها.
_سليم
_نعم ياطنط
_ينفع ياحبيبي تاخد كرمة معاك المدرسة؟ أصل باباها تعبان إنهاردة مش هيقدر يوصلها.
_أوصلها وأجيبها معايا؟
_اه ياحبيبي
مسك إيدها ونزل بيها على السلّم بخطوات بطيئة تواكب خطواتها.
_سليم
لف وبصّلها، فَ إبتسمِت وهي بتقوله: أوعى تسيب إيدها.
مسك إيدها جامد كإنّه بيأكد إنّه مش سايبها.
_حاضر.
__________
خلّصت كتابة وقفلت النوت وانا باخد نَفَسي بمشاعر متلخبطة، كل يوم بكتِب ذكرى محفورة جوّايا من زمان، وكإن القلم بيرجع يحيها في قلبي من تاني.
الفون رن للمرّة اللّي مش عارفة عددها وكانت سلمى صاحبتي،كتب كتابها إنهاردة وعايزاني أروحلها من أوّل اليوم.
: كفاية ندالة وتعالي.
_بجد مش هقدر أجيلك بدري كده.. أُعذريني
: كرمة واللّه لو مجيتيش دلوقتي مش هعرفِك تاني، مش كفاية خطوبتي مكنتيش معايا فيها؟!.. واللّه ل…
قاطِعتها بزهق لإنّها هتكرر كلامها تاني: خلاص ياسلمى هاجي، إقفلي ياحبيبتي هلبس وهاجي.. خلاص.
_____
_لأ بجد كده كتير.
_عايزة إيه تاني!.. مش جيتلِك.
_إقلعي عقد الأطفال ده ياكرمة.. بجد فاصلني ومش لايق على الدريس، وبعدين ده..
قاطعتها وانا بطلّعلها لساني: ملكيش فيه.. عاجبني.
_لأ ده جنان.
_أنا شايفاكي فاضية، مفيش وراكي أي حاجة تعمليها!.. ده انتي المفروض عروسة.
______
_الناس وصلِت وباقي المأذون، يلّا أسرَع يابنات.. كرمة حبيبتي انتي جاهزة، ينفع تيجي تساعديني أضايفهم؟
وافِقت وخرجت مع والدة سلمى.
الناس كانت كتير فَ كنت بقدّم المشروبات من غير ما أبصّلهم.
_مش معقول، كرمة!
رفعت عيني بإستغراب، إتحوّل لصدمة لمّا شوفته.. سليم.
البدلة اللّي كان لابسها كانت كفاية تعرّفني إن هوّ.. العريس.
تخطيته بسرعة وقدّمت المشروب لآخر شخص كان قاعد جنبه وانا يُعتبَر مش شايفة قدّامي، حطيت صينية التقديم على الكرسي الفاضي ومشيت.
أوّل مَ خرجت من باب البيت جريت.
_كرمة.. كرمة إستنّي.
وقف وهو بيحاول ياخد نَفَسه.
_حضرتك تعرفني؟
_انا سليم ياكرمة.
_معرفش حد بالاسم ده.
قرّب، وقف قصادي وهوّ بيبتسِم.
_بجد!.. ومين اللّي جابلِك العقد ده؟.. انا فاكره كويس، خلّصت مصروف الشهر علشان أجيبهولِك.
بصّيتله وانا برفع حواجبي بتريَقة: فعلاً؟
_اه واللّه.. ده بعشرين جنيه.
_انتَ عايز إيه ياسليم.. سايب عروستك وجاي ورايا ليه؟
