معاق

ـ معـ.ـاق؟!

ـ اه والله زي ما بقولك كدا، أنا روحت عشان أنقطها على الخِلفة لقيت الواد شكله غريب أوي كدا زي الناس المُعـ.ـاقين

ـ مش فاهمة عرفتي إزاي إنه مُعـ.ـاق أصلًا؟ المفروض الحاجة دي بتبان لما بيكبر شوية

ـ يا بنتي بيبقى ليهم شكل معروف كدا، المرض اللي هو اسمه إيه ده…! دارون؟

ـ متلازمة داون؟

ـ أيوا هي دي..

ـ لا إله إلا الله! ربنا يصبرها يا رب!

…

ـ أنتِ طالق يا مريم

ـ إيه؟ ليه؟؟

ـ لا أنتِ عارفة ليه كويس! أنا سبق وقولتلك سقطتي اللي في بطنك ده لما الدكاترة قالوا أنه هيتولد بتشوه… وأنتِ بردو أصريتي على إنك تخلفيه

ـ بس.. بس ده ابنك؟

ـ ابني ومتشوه ومش عايزه، أنا كنت مقرر أطلقك أصلًا من قبل ما تخلفي بس قولت أستنى لحد ما تولدي.. يمكن الواد ينزل سليم

ـ بس هو نازل سليم! ده كل الدكاترة قالوا إن صحته كويسة

ـ سليم بس مشوه يا هانم، عايز رعاية طول عمره! وأنا كنت عايز أخلف عشان أتسند على ابني مش ابني اللي يتسند عليا لحد ما يمـ.ـوت

ـ بعد الشر عليه.. متقولش كدا يا إسلام بالله عليك

ـ هو أنتِ متخيلة إنه هيكمل؟ ده آخره كام شهر بس ويتوكل

ـ ده مش أول ولا آخر طفل يتولد بمتلازمة داون يا إسلام! ليه بتعمل كدا؟

ـ عشان أنا مش عايز يكونلي ابن مُتأخر عقليًا زيه

ـ بس هو هيفضل ابنك!

ـ على الورق بس.. ولو كنت أعرف أسجله باسم أبوكِ كنت عملت كدا

ـ كمان؟

ـ أيوا، ويلا روحي على بيت أمك بقى عشان أنا من بكرا هدور على عروسة عشان تجيبلي طفل… طفل طبيعي!

ـ حسبي الله ونعم الوكيل..

…

ـ أنتِ كمان يا أمي؟ أنتِ كمان عايزاني أتخلى عن ابني؟

ـ ما هو لو كان طبيعي يا مريم كنا قولنا ماشي، بس العقل بيقول إنك ترجعي بيت جوزك وربنا هيرزقك بالخلف الصالح أكيد!

ـ اه أرمي ابني اللي من دمي في دار أيتام عشان أرجع لجوزي اللي رماني في الشارع بعد أسبوع واحد من ولادتي! صح؟

ـ هو مرمكيش في الشارع، الراجل مشكور وصلك بشنطة هدومك لحد الباب هنا، وزي ما خدك بالمعروف رجعك بالمعروف

ـ معروف مين ده اللي بتتكلموا عليه؟ ده رماني… لا آسفة قصدي رجعني بيت أهلي عشان خلفت طفل عنده متلازمة داون! ليه محسسني إني أنا اللي غلطانة؟

ـ أنتِ غلطانة فعلًا، كان لازم أول ما عرفتي إن الواد هيتولد مُعـ.ـاق تكوني سقطيه، مش كملتي وخلفتيه… مش عنده هو