وانت شغال ايه
ـ والأستاذ بقى شغال إيه؟!
ـ أنا دكتور مخ وأعصاب
ـ بس أنا مش بحب الدكاترة
ـ هسيب الطب يا عمي مفيش مشكلة
ـ اه أظهر وبان على حقيقتك بقى! أنت عايز تتجوز بنتي عشان أصرف عليكم إنتوا الاتنين
ـ حقيقة إيه يا عمي بس… أنا والدي عنده شركة عقارات هروح أشتغل فيها وإن شاء الله مش هخلي بنت حضرتك محتاجة حاجة
ـ طيب…. عندك كام سنة؟
ـ داخل في 31
ـ للأسف حضرتك مرفوض
ـ أفندم؟ إحنا لحقنا نتعرف أصلًا عشان أترفض؟
ـ أنت كبير أوي
ـ يا عمي بنت حضرتك عندها 26 سنة!
ـ وأنت عرفت منين؟ أنت كنت تعرف بنتي قبل ما تاجي ولا إيه؟شرفي! شرفي يـ…
ـ أقسم بالله ما كنت أعرفها.. دي أم عبير اللي رشحتلي بنت حضرتك هي اللي قالتلي سنها
ـ هرن على أم عبير وأتأكد منها
ـ رن براحتك يا عمي
ـ بس أنا بردو لسا عند رفضي.. أنت كبير
ـ هو الفرق خمس سنين بس… فرق يفتح بيت عادي
ـ مش مقتنع لا!
ـ أم عبير قالتلي إنك هتقول كدا بردو
ـ طلاما عارف إنك هترفض بتاجي ليه؟
ـ لا ما هي بردو قالتلي إن الفرق اللي كان بينك وبين زوجة حضرتك 9 سنين
ـ مش بتستر أم عبير دي
ـ ها.. ندخل في السؤال اللي بعده؟
ـ أنا مش مستلطفك
ـ هحاول أنول شرف استلطاف حضرتك بالوقت يا عمي
ـ طيب… عندك شقة؟
ـ لا أ….
ـ أنا بنتي مش هتقعد في إيجار… أتفضل الباب على إيدك اليمين
ـ يا عمي سيب ليا فرصة أتكلم!
ـ مفيش كلام ولا نقاش في الموضوع ده اتتهينا.. أتفضل من غير مطرود
ـ أنا عندي بيت!
ـ أستغفر الله العظيم يا رب! بتتزفت بتشرب سجاير؟
ـ لا يا عمي
ـ مم.. طب بص يا ابني أنت شكلك واحد محترم ومفيش فيك عيبة للأسف
ـ للأسف!
ـ أيوا، على الدوغري ومن غير لف ودوران… أنا مش عايز أجوز بنتي وعايزها جنبي
ـ إحنا هناجي نزور حضرتك كل يوم ونقعد نص اليوم هنا… ولو تحب ممكن حضرتك تاجي تسكن معانا أو إحنا نسكن معاك
ـ أنا قولت إنك طمعان في البت
ـ طمع إيه بس يا عمي! طب هقولك حل حلو!
ـ بلاش عشان هتقنعني وأنا مش عايز اتقنع بصراحة
ـ إيه رأيك لو جبت شقة جنب حضرتك!
ـ يا ابني مش قولتلك متتكلمش!
ـ آسف يا عمي… حلينا مشكلة البعد؟
ـ للأسف
ـ موافق؟
ـ بس حاسس إن أمك هتكون حما وحشة لبنتي
ـ أنا يتيم يا عمي
ـ يعني أخلاقك مش حلوة
ـ يتيم من سنتين بس يعني عيلتي لحقوا يربوني عادي… ده بفرض إن اليتا….مى مش متربين يعني
